Informacion në lidhje me qendrat e trajnimit profesional
Ministria e Punës dhe Mirëqenies Sociale përmes Agjencisë së Punësimit të Republikës së Kosovës, menaxhon tetë Qendra të Aftësimit Profesional (QAP) të cilat janë të koncentruara në shtatë Rajonet e Republikës së Kosovës : Prishtinë, Prizren, Pejë, Gjakovë, Ferizaj, Gjilan, Mitorvicë dhe Doljane (pjesa veriore e Mitrovicës) me 69 punëtori dhe 30 profesione të ndryshme. Në këto qendra bëhet aftësimi dhe ri-aftësimi i personave që janë të regjistruar si punëkërkues, të papunë dhe ata që marrin shërbimet për orientim në karrierë, pranë të gjitha zyrave të Punësimit nëpër komuna.
Aftësimi profesional përfshin dy nënmasa, si: (i)Trajnimi institucional në Qendrat e Aftësimit Profesional dhe (ii) Trajnimi i kombinuar (QAP dhe kompani).
Trajnimi institucional nënkupton trajnimi që ofrohet nga 8 Qendrat e Aftësimit Profesional (QAP) që operojnë nën ombrellën e APRK-së. Qendrat për Aftësim profesionale (QAP) ofrojnë trajnime për të papunët dhe punëkërkuesit për një profesion të caktuar falas duke u fokusuar në aplikimin e shkathtësive dhe njohurive praktike duke përdorur mësimin në kabinete të ndryshme. Qëllimi i trajnimeve institucionale është që të mundësojnë një ngritje ose adaptim të njohurive profesionale, shkathtësive dhe qëndrimeve të nevojshme për performancë efikase brenda një profesioni. Duke i mundësuar pjesëmarrësve që të marrin njohuri shtesë, shkathtësitë dhe aftësitë për të kryer punë efikase. Trajnimet në QAP-e në këtë mënyrë synojnë të rrisin perspektivën e pjesëmarrësve në punësim ose ruajtjen e punësimit të tyre.
Trajnimi i Kombinuar nënkupton bashkëpunimin me kompanitë për përfshirjen e te papunëve dhe punëkërkuesve në aftësim profesional, ku qëllimi i organizimit të kësaj komponente është ofrimi i shërbimeve ma cilësore të aftësimit profesional, përmes trajnimit në partneritet me biznes, ku mundësohet vijimi i kandidateve në QAP në modulet që më shumë kanë përmbajtje teorike, kurse modulet në të cilat mbizotëron puna praktike, zhvillohen në ndërmarrje ku edhe për këtë pjesë, kandidati pajiset nga QAP me materiale teorike mësimore dhe udhëzime me te cilat shërbehen gjatë demonstrimit të detyrave konkrete të punës të cilat realizohen nën mbikëqyrje te punëtorit profesional ne ndërmarrje. Kjo komponent e trajnimit është mjaft e avancuar sepse kandidati gjatë implementimit të programit të trajnimit ballafaqohet me detyrat konkrete të vendit të punës dhe arritjen e kompetencave në detyrat e punës në nivel shumë ma të lart sesa do ti arrinte me angazhim vetëm në QAP, ku edhe pse mundësohet demonstrimi praktik i detyrave të punës, nuk mund të ofrohen kushte reale punë sikurse ofrohen në ndërmarrje.
Sistemi trajnimit në Qendrat e Aftësimit Profesional është mjaft fleksibil, modular dhe bazohet në aftësi individuale të kandidatit. Kohëzgjatja e trajnimit është 3-6 muaj. Kandidati i nënshtrohet testit pas çdo moduli që zhvillohet si dhe testin përfundimtarë dhe pas trajnimit merr certifikatë mbi kompetencat e marra. Trajnimet janë 30% teori dhe 70% praktikë.
Informacion në lidhje me qendrat e trajnimit profesional