Portali i punës së Kosovës
Sot në Kaçanik është përuruar objekti i ri i Zyrës së Punësimit i cili do të ofrojë kushte më të mira të punës për punonjësit e Zyrës së Punësimit si dhe do të mundësoj ofrimin e shërbimeve më të mira për qytetarët. Të pranishëm në ceremoninë e përurimit ishin përfaqësues të APRK-së, si dhe zyrtarë të komunës së Kaçanikut.
Drejtori i Përgjithshëm i APRK-së, Drin Haraçia, falenderoi institucionet komunale të Kaçanikut për bashkëpunimin e treguar, si dhe uroi që kjo zyre të promovohet në forma të ndryshme me qëllim të rritjes së punësimit dhe ofrimit të mundësive për trajnimin e të rinjve dhe qytetarëve në përgjithësi.
Ndërsa nënkryetari i komunës së Kaçanikut, Ylber Bajra, gjatë fjalimit të tij tha se në objektin e vjetër punonjësit kanë punuar në kushte të vështira, por përkundër kësaj, kanë arritur suksese në realizimin e objektivave të tyre, ndërsa premtoi bashkëpunime të mëtejme dhe përkrahje nga komuna. Nënkryetari Bajra falenderoi APRK-në për jetësimin e këtij projekti të rëndësishëm.
Objekti i ri i Zyrës së Punësimit në Kaçanik është financuar nga Agjencia për Punësim e Republikës së Kosovës përmes Ministrisë së Punës dhe Mirëqenies Sociale në bashkëpunim me Komunën e Kaçanikut.
Agjencia e Punësimit e Republikës së Kosovës është organ i pavarur në kuadër të Ministrisë së Financave, Punës dhe Transfereve, me detyrën kryesore të administrimit të tregut të punës dhe zbatimin e politikave të punësimit dhe aftësimit profesional në Kosovë. APRK ka objektiva të rëndësishme, duke përfshirë përmirësimin e cilësisë dhe efikasitetit të shërbimeve publike të punësimit, modernizimin dhe reformimin e shërbimeve të aftësimit profesional, zgjerimin e mbulueshmërisë dhe rritjen e efikasitetit të masave aktive të tregut të punës, si dhe zhvillimin dhe përmirësimin e analizave për aspekte të ndryshme të tregut të punës. Agjencia ofron shërbime punësimi dhe aftësimit profesional për personat e papunë, punëkërkuesit, punëdhënësit, të punësuarit dhe shtetasit e huaj që kanë për qëllim punësimin në Kosovë. Për të koordinuar veprimtaritë e saj në nivel lokal, Agjencia ka një Zyrë Qendrore të specializuar në administrimin e politikave të punësimit, aftësimit dhe riaftësimit profesional. Zyra Qendrore e Agjencisë ka detyra të ndryshme, duke përfshirë zbatimin e politikave të Ministrisë së Financave, Punës dhe Transfereve në fushën e punësimit, aftësimit dhe riaftësimit profesional, monitorimin dhe koordinimin e zbatimit të masave dhe programeve aktive të tregut të punës, si dhe hartimin e kurrikulave, materialeve mësimore dhe procedurave të vlerësimit sipas Kornizës Kombëtare të Kualifikimeve. Për të siguruar shërbime punësimi dhe aftësimit profesional të cilësisë së lartë, Agjencia mund të kontraktojë ofrues jopublikë të akredituar, në përputhshmëri me kornizën ligjore. Gjithashtu, Agjencia publikon dhe promovon shërbimet e punësimit dhe ka si qëllim identifikimin e nevojave për trajnimin/avancimin e stafit në nivel lokal me qëllim të përmirësimit të ofrimit te shërbimeve. Në përgjithësi, Agjencia e Punësimit e Republikës së Kosovës është institucioni kryesor në fushën e punësimit dhe aftësimit profesional në Kosovë, duke punuar për të koordinuar dhe zbatuar politikat qeveritare në këtë fushë.
