Portali i punës së Kosovës
Në vazhdën e
analizimit të kërkesave të punëkërkuesve dhe të papunëve të regjistruar në
Zyrat e Punësimit, Agjencia e Punësimit e Republikës së Kosovës (APRK),
nëpërmjet Departamentit të Aftësimit Profesional (DAP) në vazhdimësi pasuron
profilet e aftësimit profesional në të gjitha Qendrat e Aftësimit Profesional
(QAP), duke shtuar kurse të reja.
Nga muaji mars i
këtij viti, në QAP në Prizren ka nisur kursi për instalues elektrik në banesat
kolektive (IEBC) për të cilin ka pasur kërkesa të mëdha nga punëkërkuesit e
regjistruar.
Pas përfundimit
të kursit për IEBC, punëkërkuesit do të aftësohen në përfitimin e njohurive për
instalime elektrike, përdorim të pajisjeve të nevojshme dhe kryerje të punëve
sa i përket instalimeve elektrike.
Kursi i IEBC
sjell shumë përparësi për punëkërkuesit, duke u mundësuar atyre që të punësohen
në ndërmarrje publike ose private të cilat kryejnë veprimtari instalimi
elektrik në banesat civile, të vetëpunësohen duke kryer instalime elektrike në
ndërtesa apo edhe të krijojnë biznese të vogla të menaxhuara nga instaluesi
elektrik.
Të gjithë
qytetarët të cilët regjistrohen si punëkërkues dhe të papunë në Zyrat e
Punësimit që kanë mbaruar arsimin e detyruar, që kanë mbaruar arsimin e mesëm
të përgjithshëm apo profesional ose që zotërojnë një profesion i cili nuk është
i kërkuar në treg, kanë të drejtë të aftësohen, vlerësohen dhe certifikohen në
QAP.
APRK ka në menaxhim rrjetin e QAP në të gjitha qytetet kryesore të vendit ku ofrohen një mori profilesh të aftësimit profesional, profile të kërkuara në tregun e punës duke i aftësuar punëkërkuesit dhe duke i bërë të gatshëm për tregun e punës. Shumica dërmuese e punëkërkuesve, pas mbarimit të kursit dhe certifikimit në QAP, arrijnë të punësohen apo hapin bizneset e tyre në profilet përkatëse ku janë aftësuar profesionalisht.
Agjencia e Punësimit e Republikës së Kosovës është organ i pavarur në kuadër të Ministrisë së Financave, Punës dhe Transfereve, me detyrën kryesore të administrimit të tregut të punës dhe zbatimin e politikave të punësimit dhe aftësimit profesional në Kosovë. APRK ka objektiva të rëndësishme, duke përfshirë përmirësimin e cilësisë dhe efikasitetit të shërbimeve publike të punësimit, modernizimin dhe reformimin e shërbimeve të aftësimit profesional, zgjerimin e mbulueshmërisë dhe rritjen e efikasitetit të masave aktive të tregut të punës, si dhe zhvillimin dhe përmirësimin e analizave për aspekte të ndryshme të tregut të punës. Agjencia ofron shërbime punësimi dhe aftësimit profesional për personat e papunë, punëkërkuesit, punëdhënësit, të punësuarit dhe shtetasit e huaj që kanë për qëllim punësimin në Kosovë. Për të koordinuar veprimtaritë e saj në nivel lokal, Agjencia ka një Zyrë Qendrore të specializuar në administrimin e politikave të punësimit, aftësimit dhe riaftësimit profesional. Zyra Qendrore e Agjencisë ka detyra të ndryshme, duke përfshirë zbatimin e politikave të Ministrisë së Financave, Punës dhe Transfereve në fushën e punësimit, aftësimit dhe riaftësimit profesional, monitorimin dhe koordinimin e zbatimit të masave dhe programeve aktive të tregut të punës, si dhe hartimin e kurrikulave, materialeve mësimore dhe procedurave të vlerësimit sipas Kornizës Kombëtare të Kualifikimeve. Për të siguruar shërbime punësimi dhe aftësimit profesional të cilësisë së lartë, Agjencia mund të kontraktojë ofrues jopublikë të akredituar, në përputhshmëri me kornizën ligjore. Gjithashtu, Agjencia publikon dhe promovon shërbimet e punësimit dhe ka si qëllim identifikimin e nevojave për trajnimin/avancimin e stafit në nivel lokal me qëllim të përmirësimit të ofrimit te shërbimeve. Në përgjithësi, Agjencia e Punësimit e Republikës së Kosovës është institucioni kryesor në fushën e punësimit dhe aftësimit profesional në Kosovë, duke punuar për të koordinuar dhe zbatuar politikat qeveritare në këtë fushë.
